日本一蘭出「集中力Counter」套裝 枱上即變拉麵店

日本著名拉麵連鎖店一蘭（Ichiran）推出「味集中Counter」套裝，讓 fans 喺屋企枱上都可以重現店內獨特嘅單人座位體驗。套裝細心到連 call 掣同竹簾都有，仲可以㩒掣叫「替玉」。日本記者試玩後大讚，話可以喺 office 開到一間「一蘭SoraNews24分店」。

日本一蘭拉麵向嚟以「味集中Counter」聞名——客人坐喺有隔板嘅單人座位，透過竹簾接收拉麵，專心食麵唔使理人。最近呢間人氣連鎖店竟然將成個體驗打包，推出「味集中Counter套裝」，等 fans 喺屋企或者 office 枱上都享受到同樣嘅滋味。

據《SoraNews24》報道，呢個套裝係為咗慶祝一蘭 souvenir 產品「博多細直麵」推出十周年而設。內容包括一塊 overhead 招牌、幾塊側板、竹簾同 call 掣，全部要自己砌。日本記者 Ahiruneko 收到後即刻試玩，喺 office 枱上砌咗間「一蘭SoraNews24分店」出嚟。

最令佢驚喜嘅係，呢個迷你套裝唔單止有齊招牌同側牌嘅細節，連 call 掣都識得發出同真正一蘭餐廳一樣嘅叮蘭餐廳一樣嘅叮噹聲。㩒掣叫「替玉」（追加麵），然後自己行去廚房煮好，再抬返嚟——竹簾一升起，碗拉麵啱啱好 fit 到個位，完全係店內感覺。

Ahiruneko 話，個套裝就似「學生用教科書遮住食零食」咁，但因為三面有牆，同事根本唔會發現佢喺 office 入面食緊一蘭。佢仲話，呢種「專心食麵」嘅環境，令佢可以完全投入，唔驚老細同社長眼望望。

套裝分兩個版本：5份麵嘅套裝賣 3,850 日圓（約 200 港幣），10份麵嘅套裝賣 4,980 日圓（約 260 港幣）。10份版只限網上 store，5份版就網上同實體店都有得買。香港 fans 如果想重現呢個「一人拉麵時光」，可能要趁仲有貨快啲入手喇。