爸爸打噴嚏似火山爆發 專家揭背後原因

爸爸打噴嚏點解咁大聲？專家話同肺容量有關，但更大原因係性別「展示規則」——細個女仔成日俾人叫收聲，男仔就冇咁多規矩，所以大個咗打噴嚏都冇咁收斂。

爸爸打噴嚏，成日都似係拆樓咁大聲——先嚟一個誇張嘅吸氣，然後一聲「阿嚏」，成個人都向後震，嚇到屋企隻狗走晒。原來呢個現象唔單止係你屋企先有，據《紐約郵報》報道，社交媒體上爸爸打噴嚏嘅影片有成百萬次觀看，甚至連Will Ferrell都拍過搞笑短片模仿。

有網民留言話：「我覺得爸爸打噴嚏係原子彈嘅靈感來源，每次打完耳仔都嗡到暈。」另一個話：「我老竇都係咁！好似屋頂都震埋！」呢啲「爸爸噴嚏」已經變成一種網絡文化，連ChatGPT都識得話：「爸爸們似乎決定咗打噴嚏係一件要用晒成個身體去做嘅事。」

咁究竟點解爸爸打噴嚏特別大聲？兒童免疫學專家Zachary Rubin醫生解釋，打噴嚏係一種保護性反射，用嚟清除鼻腔嘅刺激物。而噴嚏嘅音量會受肺容量、呼吸肌肉力量、鼻腔同喉嚨結構等因素影響。男人一般肺容量較大，呼吸壓力亦較大，所以噴嚏理論上會更大力。

不過，Rubin醫生強調，冇足夠證據顯示男人天生打噴嚏就一定會大過女人。心理學家Rod Mitchell就話，關鍵在於性別「展示規則」——細個女仔成日俾人叫「唔好嘈」、「坐好啲」，呢啲規矩會變成自動反應，連打噴嚏都會忍住；但男仔細個就冇咁多約束，大咗自然就放得開。

有趣嘅係，受訪嘅爸爸都話自己喺街外會收斂啲，但返到屋企就忍唔住「放晒出嚟」。一位爸爸話：「我覺得大聲噴嚏先夠爽。」另一位就話：「以前試過忍住，差啲爆咗個腦。」Rubin醫生都話，一般人忍住噴嚏唔會出事，但最好都係噴出嚟，不過記得用紙巾或者手臂遮住。