深圳32歲男開「搔癢按摩店」 月賺15萬港元　一小時收費$300

深圳一名32歲男子張小超受網上短片啟發，開設「搔癢按摩店」，客人只需躺下，由員工戴上尖膠指甲輕搔全身。開業短短數月，每月收入達15萬港元，他計劃在全國開設100間分店。

深圳32歲男子張小超，因為睇到一條「老婆幫老公搔背」嘅網上短片，發現好多網民留言話「好想俾錢叫人幫我搔」，靈機一觸開設咗一間「搔癢按摩店」。佢細個最鍾意喺爸爸輕輕搔背嘅時候入睡，於是決定將搔癢變成商業服務。

張小超嘅創業路並唔平坦。佢喺一間唔出名嘅大學畢業後，一年內換咗七份工，之後兩次創業都失敗收場。不過佢冇放棄，今年5月喺深圳寶安區開咗第一間搔癢按摩店，結果一炮而紅。

據馬來西亞《星洲日報》報道，張小超短短幾個月內已經開咗第二間分店，兩間店每月合共收入約10萬元人民幣（約15萬港元）。佢話服務已經有利潤，仲計劃喺全國開100間分店，希望將「搔癢師」發展成一個受認可嘅職業。

呢個服務非常簡單：客人瞓低之後，員工會戴上尖膠指甲，輕輕喺客人身上搔癢。張小超話自己研究咗唔同嘅搔癢技巧，部分仲係從零發明出嚟，因為市面上根本冇類似服務可以參考。

張小超話：「大城市嘅人壓力好大，對呢種服務嘅需求好強。有客人話比我哋嘅服務仲放鬆過按摩，我哋已經有好多熟客。」佢收費每小時300元人民幣（約330港元），目標係幫人減壓同改善睡眠質素。

對於香港呢個壓力爆煲嘅城市嚟講，呢種搔癢按摩店會唔會係下一個減壓熱點？唔知有冇港商會引入香港呢？