京都伏見稻荷大社禁跳舞 遊客鳥居下拍片捱轟

京都著名神社伏見稻荷大社近日有遊客在鳥居下跳舞拍片，引發網民強烈不滿。神社在9月7日發中英雙語公告，強調境內是逾1300年歷史的聖地，嚴禁跳舞等不敬行為。

去京都旅行，神社寺廟係必到景點，但最近有遊客將聖地當做跳舞舞台，引來軒然大波。據日本媒體《SoraNews24》報道，伏見稻荷大社嘅鳥居下，有外國遊客拍攝跳舞短片，上載至TikTok及Twitter後，隨即被網民狠批行為離譜，阻礙其他遊客通行之餘，更踩出行人路，干擾被視為神聖嘅自然環境。

除了上述片段，近日亦有一班來自新西蘭嘅毛利族女性，喺神社參道上表演傳統嘅Poi舞。呢條片同樣引發批評，連新西蘭出生嘅毛利裔職業摔角手Henare都開聲譴責，指出喺聖地跳舞同樣違反毛利族習俗。佢更親自聯絡到涉事人士，要求佢哋向伏見稻荷大社捐出一筆可觀嘅款項作為道歉。

面對社交媒體上嘅跳舞熱潮，伏見稻荷大社終於在9月7日發出中英雙語告示，提醒遊客要遵守禮儀。神社接受《J-Cast News》訪問時確認，境內確實有人拍攝跳舞片段，職員一旦發現違規或滋擾行為，會即時上前勸阻。神社表示，雖然跳舞未造成實質損毀，但對遊客未能理解當地文化意義感到失望。

香港人去日本旅遊成風，神社寺廟更是熱門打卡點。呢次事件提醒大家，神社係神明居所、信徒祈禱嘅地方，並非跳舞片場。下次去日本神社參觀時，記得保持尊重，否則想拍片爆紅，隨時會惹禍上身，甚至被「取消」。