開會覆email前望多兩眼先送出 把口易惹是非今日唔好講人八卦

今日火星三合海王星，人易攰記性差，出門口前要執齊隨身物品，工作嘢記得多核對一次，感情上要主動啲。

今日太陽喺天秤座，月亮走入巨蟹座，心情梗係有啲起伏。加埋火星三合海王星，成個人好似未瞓醒咁，行步路都慢半拍。出門口之前最好停一停，諗一諗鎖匙、電話同銀包呢堆隨身法寶，好易漏低一兩樣。

返工嗰陣記性爭啲，開會傾嘢或者撳掣覆email之前，記住睇清楚內容先好送出街。你今日把口同寫出嚟嘅字特別惹人誤會，唔覺意就會搞出啲是非漩渦。同同事吹水嗰陣，戒一戒講人是非嘅癮，呢啲說話傳得特別快，轉個頭就入返當事人耳仔。

講到錢財，今日個腦唔係好清醒，判斷力弱，唔多適合走去掂投資或者扑槌買大件嘢。忍一忍手，慳慳哋過日，等轉頭思路清晰先再決定都未遲。

個人攰起上嚟抵抗力都跌watt，早啲爬上床，再灌多兩杯水實冇死。感情路上，單身嘅話，今日撞到嘅對象氣場未必好夾，望多兩眼先。有伴嘅呢，個人今日零舍容易忟，把口快過個腦，要主動捉住對方傾多兩句偈，將啲唔覺意生出嚟嘅誤會及時拆掂佢。