開會把口唔聽使講錯嘢辣㷫人 夜晚發夢紮醒沖個熱水涼先瞓

今日容易講錯說話，特別喺開會或者傾生意嘅場合，少講兩句為妙。財運一般，唔好衝動投資。

成個下晝個人燥燥哋，金星同冥王星鬥法，把口好似唔聽使咁，無端端就爆咗句嘢辣㷫人。開會嗰陣最明顯，明明個心諗住擦吓鞋，出到口竟然變咗窒人，全場靜晒，尷尬到想搵窿捐。今日最好做配角，聽多過講。

錢銀方面冇乜起色，見到個 plan 包裝得好靚唔好即刻扑鎚，呢類聽落穩賺嘅嘢，好多時都係陷阱。忍一忍手，慳住荷包先，過兩日再睇唔會蝕底。

感情運都係咁上下，另一半表面笑騎騎，但你一句無心說話隨時踩中地雷，塊面即刻黑過鑊撈。到時點𠱁都冇用，索性自動自覺去洗碗拖地，用行動表示誠意仲實際。

健康方面，夜晚成晚發夢，紮醒幾次，個人好似冇真正休息過。今晚唔好再捱夜碌手機，早少少沖個熱水涼，攤喺床放空一陣，好過夾硬透支精神。