JR東日本新宿站推會走動垃圾桶 電車造型機械人幫你清垃圾

JR東日本在新宿站地下大廳試行以會走動的機械人垃圾桶，電車造型配上大眼睛，吸引遊客注意。旅客可直接將垃圾投入行經身邊的機械人，解決站內垃圾桶不足問題。測試為期兩個幾月，成功後或擴展至其他車站。

去日本旅遊，成日都面臨一個煩惱：垃圾桶去咗邊？新宿站嘅垃圾問題一直困擾遊客，但JR東日本最近諗到一個有創意嘅解決方法——推出會行會走嘅機械人垃圾桶。

據《SoraNews24》報道，JR東日本今個月起喺新宿站地下1樓大廳試行多部垃圾回收機械人。呢啲機械人外形設計成電車造型，車頭有對大眼睛吸引途人目光，車身仲印有新宿站吉祥物「新宿熊」嘅圖案，相當可愛。

呢款機械人係由美國公司Cartken開發嘅自動配送機械人，由Melco Mobility Solutions同三菱電機負責營運。機械人會自動沿住預設路線喺地下大廳東西兩邊嘅閘口內走動，兩側設有開口，乘客行過時可以順手將垃圾掟入去。

JR東日本表示，呢次測試係為咗提升車站服務質素同清潔效率，但最大挑戰係要睇下機械人可以喺號稱全球最繁忙嘅新宿站入面，避開人群暢順行走。新宿站嘅地下通道出名好似迷宮咁，測試期間會評估機械人嘅感應器同導航技術，以及人潮擠擁時會唔會出現問題。

測試期由9月8號至11月20號，逢星期一至五早上10點至下午5點進行。香港人去開日本旅行嘅話，下次經過新宿站或者有機會見到呢啲可愛機械人，到時記得將手上垃圾留俾佢，順便打卡影相。