美國女醫生瞓覺遭蝙蝠鑽口 醒來摸到「又滑又毛」嚇到掟開

美國維珍尼亞州一名腸胃科女醫生睡夢中驚醒，發現有一隻蝙蝠正試圖鑽進她的嘴巴。她立即將蝙蝠掟開，並呼籲公眾注意家居防蝙蝠措施及狂犬病風險。

美國維珍尼亞州列治文市一名腸胃科女醫生克里斯特·埃德爾曼（Dr. Krista Edelman），日前在睡夢中驚醒，發現有一隻蝙蝠正試圖鑽進她的嘴巴，場面極度驚嚇。

埃德爾曼在Instagram發文講述事發經過，她說當時正發夢有一隻小老鼠想走入她的口中，醒來後伸手摸到嘴唇邊有「又滑又毛、涼涼哋」嘅物體，先意識到真係有隻蝙蝠想鑽入佢個口。佢即時嚇到尖叫，將蝙蝠掟咗出去。

埃德爾曼事後表示，佢老公一度想用T-ball球棒將蝙蝠打死，但佢憑專業知識知道咁樣做唔啱，因為需要活捉蝙蝠去檢驗有冇狂犬病。佢最終成功用桶捉住蝙蝠，送去化驗，結果證實蝙蝠冇帶狂犬病病毒。

不過，由於埃德爾曼冇接種過狂犬病疫苗，加上同蝙蝠有直接接觸，佢都去咗急症室接受疫苗接種同免疫球蛋白注射，以策萬全。

據《紐約郵報》報道，美國有超過40種蝙蝠，健康嘅蝙蝠通常會避開人類，但夏天炎熱，蝙蝠會匿入閣樓或煙囪降溫，容易同家居人類接觸。蝙蝠係狂犬病主要傳播源之一，美國七成狂犬病死亡個案都係由蝙蝠傳播。

埃德爾曼呼籲公眾，如果屋企係舊樓，記得檢查閣樓同煙囪；如果瞓覺時有蝙蝠出現，就算唔確定有冇接觸，都應該盡快求醫。香港郊區或村屋都唔時有蝙蝠出沒，大家都要提高警覺。