男人剪眼睫毛扮man 醫生警告：一刀錯手恐失明

外國興起一股奇怪美容潮流，男士為求陽剛味，竟特意去髮型屋將眼睫毛剪短，無懼手術風險。專家警告，眼睫毛有保護眼睛功能，亂剪隨時感染甚至整傷眼球。

為咗有個「男子氣概」嘅外表，你願意去到幾盡？外國最近興起一股奇怪美容趨勢，一班男士竟然走去髮型屋，叫師傅將佢哋嘅眼睫毛剪短，務求令自己睇落更加粗獷。據《Oddity Central》報道，呢股風氣由上年開始喺TikTok等社交媒體湧現，點知冇消失之餘，仲越吹越勁，變成全球熱話。

呢種行為被部分人同「Looksmaxxing」掛鉤，但其實相當危險。眼睫毛絕對唔係純粹裝飾，佢肩負住保護眼睛嘅重任，可以阻擋灰塵、死皮、汗水，甚至紫外線入侵。就咁剪到得返一截截，分分鐘令眼睛失去防線，增加感染、痕癢同埋長期不適嘅風險。

就算啲眼睫毛之後會生返出嚟，都要等幾個月時間。除咗感染風險，最恐怖嘅係剪嘅過程，將鋒利嘅金屬刀片揸到咁近對眼，一個唔留神，手震一下，後果真係不堪設想。

有專家指出，眼睫毛長短其實係由遺傳基因決定，男女都有機會有長眼睫毛。將長眼睫毛同「女性化」掛鉤，純粹係一啲文化偏見，並無科學根據。為咗一個虛構嘅標準，去承受整親眼睛嘅風險，真係諗得過？

其實香港都有好多男士注重儀容，但呢種咁極端嘅做法，都係咪亂試。愛靚還愛靚，健康同安全先至係最重要。