橫濱駅樹輪蛋糕自動販機 賣豪華郵輪款甜品

橫濱馬車道駅閘外出現一部售賣德國樹輪蛋糕（Baumkuchen）嘅自動販機，蛋糕來自愛知縣Cocotomo Farm，本身係豪華客船飛鳥III號嘅歡迎禮物。全部蛋糕經冷凍保存，軟硬兩種口感都有，最正係硬版邊邊，六件只需500日圓。

橫濱港未來線馬車道駅嘅閘口外面，最近出現咗一部與別不同嘅自動販機，引來唔少途人目光。呢部機賣嘅唔係一般飲品或零食，而係日本人大愛嘅德國樹輪蛋糕（Baumkuchen），而且佢仲有個特別來頭——係日本最大豪華客船飛鳥III號上用嚟歡迎乘客嘅禮物。

據《SoraNews24》報道，呢批蛋糕由愛知縣嘅Cocotomo Farm生產，用自家米粉整成，完全無麩質。佢之所以會出現喺橫濱呢個平凡駅度，可能係因為附近有幾個國際郵輪碼頭，但確實原因仍然係個謎。機內蛋糕全部經冷凍保存，保持新鮮，拎出嚟等一陣解凍返就可以食。

記者試咗一個組合包，裡面有一件軟版同硬版蛋糕，盛惠650日圓（約港幣33蚊），另外仲買咗一包硬版蛋糕邊，六件先500日圓（約港幣25蚊）。軟版蛋糕口感濕潤細緻，完全唔似無麩質食品；硬版則扎實有嚼勁，帶有糙米特有嘅近似堅果味道，同普通樹輪蛋糕好唔同。

最令人驚喜嘅係硬版蛋糕邊，外表粗糙，但味道同質感都更加濃厚，記者話佢係成個試食環節嘅最愛，而且價錢超值。呢部Cocotomo Farm販機唔知會喺馬車道駅企幾耐，如果佢走咗，仲可以去Muji買返類似產品頂癮。