東京燒肉店設直播專座 燈光相機齊備畀你邊食邊拍片

日本連鎖燒肉店「燒肉Like」喺新宿南口店增設一個名為「Studio Like」嘅特別座位，配備化妝燈、相機支架同佈景，專為想邊食邊拍片直播嘅客人而設。呢個座位可容納兩人，但需要預約，使用時段為上午11點至晚上9點半。

日本燒肉店成日有，但「燒肉Like」（Yakiniku Like）呢間連鎖店就搞出新花款——佢哋喺東京新宿南口店整咗個「Studio Like」座位，專為鍾意影相同拍片上社交媒體嘅客人而設。據《SoraNews24》報道，呢個座位位於店內一角，配備化妝燈、相機支架同佈景，仲有牆壁隔開，唔驚隔籬枱嘅人影到，直播都得。

「燒肉Like」本身係一人燒肉店，每個座位都有獨立燒烤爐同醬汁，好啱獨食人士。但諗到客人可能想一邊燒肉一邊影相同直播，佢哋就整咗呢個「Studio Like」座位，仲請咗演員兼社交媒體紅人岩田麻里有（Maari Iwata）試用。座位雖然只有一個燒烤爐，但夠大容納兩個人，可以叫埋朋友或者拍檔一齊玩。

呢個座位每次可用60分鐘，但只限上午11點至晚上9點半，同餐廳開放時間（上午11點至晚上11點）有啲唔同。預約要經官方Line帳戶搞掂，而家已經可以申請。香港讀者如果去開東京新宿，不妨去試下，邊食燒肉邊拍片，順便呃吓like。